2025 個人年度高達模型總結(上)

筆者呢一年都不斷分享製作模擬經驗，但就好少分享自己嘅作品。其實筆者今年都砌咗相當數量嘅中小比例模型，主要都係集中喺 1/144嘅比例。

因為大部份都係過去嘅商品，所以筆者就唔做年度最佳的評比。就係針對筆者個人嘅收藏目標，推薦一啲筆者認為有質素嘅商品。筆者同大眾嘅審美不太一樣，最主要因為筆者考量自主站立嘅關係，例如好多大背包機體，對澳門土地資源短缺環境，長期保存嚟講都係唔合適，所以呢類都唔係筆者收藏的首選。最後入圍筆者嘅名單，通常係一啲輕型機、人型機。

HG 新生紅渣古

UC 元祖呢個系列，代表住最原始嘅設計，對於玩慣後期系列嘅朋友嚟講，紅渣古真係好樸素，就係因為呢種樸素令佢身上面嘅線條設計比較獨特，再加上佢係圓面裝甲比較多，佢所需要嘅製作加工工序唔多，簡單加深刻線，唔需要補色都已經有好高完成度。

HG 不朽正義

上一年嘅劇場版機體，如果你依家買嘅話價錢應該係回落到一個好合適嘅價錢，佢同其他主角機唔太一樣，因為佢背包係得兩片細細嘅翼，想要站立係好容易。加上佢係匕首格鬥機，玩法比較特別。而且係新嘅設計，補色亦無rising freedom 咁多，好適合爽砌爽玩。

HG 無限正義二式

如果背包嘅規則嚟講，呢台機應該係唔符合筆者嘅標準。但因為呢部機嘅背包，係一台小飛機，可以單獨拆出作為展示。就展示+可玩性，一齊考量，整體都算唔錯。（除咗價錢比較硬之外。）

原本mighty strike freedom 都想列入其中，但最尾還係除名。考慮榮耀防衛者，對於整台機體的展示方式，收納時候好臃腫，分開展示，主體機又顯得好肥，而且背翼展開，對於MR魂，的確差咗一個等級，所以呢台機就冇推薦。

EG Build Strike Exceed Galaxy

簡單粗暴特別。

因為筆者喺素組嘅途中整壞咗頭部，所以用咗其他棄件代替。亦因為咁，意外地創造咗一種新感覺。因為呢個系列係鼓勵自由組合，整出嚟效果唔會太差。不過就係EG嘅關節容易損壞，所以把玩要很小心

EG Perfect strike

不過不失。背包雖然重，但係因為有大件同埋大炮可以作為支撐，收納情況下，可以自主站立（當然上支架可以更挺），對比筆者過去舊有嘅RG， EG呢一款雖然細節比較少，但比較硬淨。RG 多年之後好多件都要落膠水黐死，EG 相對冇咁容易鬆脫。站屍一流。

本年度筆者還有其他推薦的模型，不過需要時間慢慢找出來拍一拍。有興趣的朋友記得留意筆者的更新。